Pablo Marí lánaður til Udinese (Staðfest)

Udinese hefur staðfest að félagið hafi fengið Pablo Marí lánaðan frá Arsenal. Þessi 28 ára leikmaður spilar með ítalska liðinu út tímabilið en ekki er nein klásúla um möguleika á kaupum eftir tímabilið.

<i>„Ég er stoltur og glaður. Ég hlakka til að byrja nýtt ævintýri og gefa allt fyrir félagið og stuðningsmennina,"</i> skrifaði varnarmaðurinn á Twitter.

Marí gekk í raðir Arsenal frá Flamengo fyrir 6 milljónir evra í júlí 2020 en hefur aðeins spilað 22 leiki í öllum keppnum fyrir félagið.

Udinese er í fjórtánda sæti ítölsku A-deildarinnar, sex stigum fyrir ofan fallsvæðið. Liðið hefur fengið á sig 36 mörk í 22 deildarleikjum og ráku stjórann Luca Gotti í desember. Aðstoðarmaðurinn Gabriele Cioffi fékk stöðuhækkun og tók við liðinu.

Marí gæti spilað sinn fyrsta leik fyrir Udinese á laugardag þegar liðið heimsækir Genoa í mikilvægum leik.