Markmiðið með þessu móti er að gefa ungum austfirskum leikmönnum fleiri tækifæri á samkeppnishæfum leikjum á undirbúningstímabilinu.

Tvö lið frá Fjarðabyggð auk liða frá Hetti/Huginn, Leikni og Sindra eru skráð til þátttöku í mótinu sem leikið verður í Fjarðabyggðahöllinni á Reyðarfirði. Fyrstu leikirnir verða um helgina og teygja sig svo yfir næstu fimm helgar, auk þess sem ein umferð verður leikin í miðri viku. Fyrst verður leikið með deildarfyrirkomulag en síðar úrslitakeppni.

„Fjarðabyggð á lítinn séns í lið úr efri hluta úrvalsdeildar sem jafnvel er að berjast um að komast í Evrópukeppnina. Mót eins og þetta er meira heillandi fyrir unga leikmenn, að spila þéttar og meira. Ég held þetta sé jákvætt fyrir Austurland að vera komið á þann stað að geta haldið úti okkar eigin móti," segir Helgi Freyr Ólason, formaður knattspyrnufélags Fjarðabyggðar, við Austurfrétt.