Klopp: Mér að kenna - Erfitt að útskýra hvað gerðist

„Þetta er eins og að vera kýldur í framan eða hvað sem þið segið hérna á Englandi," sagði Klopp að leikslokum. „Auðvelda útskýringin er að þetta er mér að kenna. Það er á minni ábyrgð að leikmönnum líði vel og þeir séu fullir sjálfstrausts á vellinum. Hugarfar leikmanna er á minni ábyrgð."

Ashley Barnes gerði eina mark leiksins úr vítaspyrnu á lokakaflanum eftir að Alisson var dæmdur brotlegur innan eigin vítateigs.

„Alisson segist ekki hafa snert sóknarmanninn en ég get ekki tjáð mig því ég er ekki búinn að sjá atvikið endursýnt."

Sóknarleikurinn hjá Liverpool er hikstandi og hefur liðinu mistekist að skora í síðustu fjórum úrvalsdeildarleikjum.

„Strákarnir eru að taka rangar ákvarðanir og það er mjög erfitt að útskýra hvað gerðist, hvernig við fórum úr 7-0 sigrum yfir í þetta. Það er undir mér komið að passa að strákarnir séu rétt stemmdir.

„Við erum ekki að leita að blórabögglum, það sem við þurfum að gera er að standa saman og halda áfram að spila góðan fótbolta. Við þurfum bara að taka réttar ákvarðanir í sóknarleiknum."