Tinna Brá samdi við Fylki á dögunum.
Fylkir samdi á dögunum við markvörðinn efnilega Tinnu Brá Magnúsdóttur. Hún kemur til félagsins frá Gróttu.
Tinna er aðeins sextán ára gömul en hún lék alla 17 leiki Gróttu í 1. deildinni á síðasta tímabili.
Þær Hulda Mýrdal og Mist Rúnarsdóttir, sem stýra hlaðvarpsþættinum Heimavellinum, telja þetta vera skýr skilaboð um að Cecilía Rán Rúnarsdóttir sé á leið frá Fylki. Cecilía hefur verið orðuð við félög erlendis, þar á meðal Everton á Englandi.
„Ég hitti Cecilíu í fyrra dag og hún vildi ekkert segja hvað væri að fara að gerast," sagði Hulda í Heimavellinum.
„Þetta eru nú ansi skýr skilaboð að það sé verið að sækja einn efnilegasta markvörðinn úr Lengjudeildinni síðasta sumar," sagði Mist og bætti Hulda við: „Hún er ekki að koma til að sitja á bekknum held ég. Tveir plús tveir eru líklega fjórir."
Hlusta má á Heimavöllinn í heild sinni hér að neðan.
Athugasemdir
