Balotelli gæti verið á förum frá Brescia.
Sóknarmaðurinn Mario Balotelli gæti verið á förum frá ítalska úrvalsdeildarfélaginu Brescia. Umboðsmaður hans, Mino Raiola, er sagður byrjaður í viðræðum við brasilíska félagið Vasco de Gama og tyrkneska félagið Galatasaray.
Balotelli skoraði fimm mörk í 19 deildarleikjum fyrir Brescia áður en hlé var gert á ítölsku úrvalsdeildinni vegna kórónuveirufaraldursins.
Balotelli er aðeins á fyrsta tímabili sínu hjá Brescia, en gæti verið á förum eftir tímabilið að sögn Football Italia.
Afar ólíklegt er að Brescia verði í ítölsku úrvalsdeildinni á næstu leiktíð, nema kannski ef að keppni verður hætt og ekkert lið fellur. Brescia er sem stendur á botninum, sex stigum frá öruggu sæti.
Balotelli er þekktur vandræðagemsi sem hefur komið víða við á ferlinum og hefur hann meðal annars spilað fyrir Liverpool og Manchester City í ensku úrvalsdeildinni. Nú gæti hann verið á leið til Brasilíu eða til Tyrklands.
Birkir Bjarnason er liðsfélagi Balotelli hjá Brescia.
Sjá einnig:
Ítalska deildin verður að klárast fyrir 20. ágúst
Mino Raiola.
Athugasemdir
