Reglur FIFA segja að landsliðin geti farið fram á að leikmönnum verði sleppt þann 27. desember en Afríkukeppninni mun ljúka í annarri viku febrúarmánaðar.

Liverpool gæti spilað allt að átta leiki á þeim tímakafla, þar á meðal mikilvæga deildarleiki gegn Chelsea og Leicester, leik í þriðju umferð FA-bikarsins og einnig er mögulegt að liðið verði í undanúrslitum deildabikarsins.

Jurgen Klopp, stjóri Liverpool, hefur átt í góðu sambandi við öll þrjú landsliðin og vonast til þess að fundir sem skipulagðir eru í nóvember muni gera það að verkum að hann fái að sleppa leikmönnunum eftir áramót.

Liverpool mætir Chelsea 2. janúar og ef Salah og Mane fara eftir þann leik þá myndu þeir samt fá meira en viku til að búa sig undir fyrstu umferð Afríkukeppninnar.

„Ég er hrifinn af Afríkukeppninni, en að hún sé aftur komin í janúar er stórslys fyrir okkur," sagði Klopp á sínum tíma um Afríkukeppnina.

Afríkukeppnin átti upphaflega að fara fram á þessu ári en var færð til vegna heimsfaraldursins.