Treforest, lítið þorp í Wales, virkar sem furðulegur staður fyrir nýjan aðstoðarmann Jose Mourinho að hafa byrjað menntun sína í þjálfun. Bærinn er fæðingarstaður söngvarans Sir Tom Jones, annars er lítið hægt að skrifa um þorpið.

En fyrir Joao Sacramento var það byrjunin að leit hans að ferli á hæsta stigi fótboltans. Hann var óhræddur við að fara út úr þægindarammanum.

Átján ára gamall, flutti Sacramento frá Portúgal til Treforest til þess að stunda nám við Háskólann í Glamorgan - eins og hann hét þá - vegna þess að þar var fótboltanámskeið sem aðeins var hægt að finna á fáeinum öðrum stöðum í Evrópu. Það var ekki hægt að finna það í Portúgal.

Hann spilaði ekki leikinn að neinu viti, heldur lagði áherslu á að skilja þjálfaraaðferðir og í þeim skilningi gæti Mourinho, sem hefur áður ráðið einstaklinga með lítinn sem engan leikmannabakgrunn, séð spegilmynd af sjálfum sér. Mourinho spilaði ekki mikið, hann fór fljótt að hugsa um þjálfun.

Foreldrum Sacramento leist ekki á blikuna þegar hann vildi fara til Wales. „Foreldrar hans vildu að hann myndi læra eitthvað hefðbundið, eins og verkfræði," segir Dave Adams sem fór fyrir námskeiðinu í Glamorgan (núna Háskólinn í Suður-Wales). „Hann hafði áhuga á þjálfun frá unga aldri. Hann komst að náminu á netinu og vissi að það bauð upp á réttindi og gráðu í fótbolta sem ekki væri hægt að finna í Portúgal. Foreldrar hans voru ekki hrifin, þau voru ekki viss um starfsmöguleikana. Við náðum að sannfæra þau."

Sacramento kunni frönsku og spænsku, en hann kunni lítið í ensku þegar hann fluttist til Wales.

Hann kunni mikið að meta þær æfingaaðferðir sem Mourinho kom með til Englands, þegar hann náði frábærum árangri er hann tók við Chelsea í fyrsta sinn. Mourinho vildi alltaf hafa liðið í fótbolta, ekki í þrekvinnu. Hugmyndin er þróuð af Vitor Frade í Háskólanum í Porto.

„Allt áherslur leiksins koma saman," segir Adams. „Þegar þú ert að vinna í tæknilega hlutanum eða taktíska hlutanum, þá ertu á sama tíma að vinna í líkamlega hlutanum."

John Terry, fyrrum fyrirliði Chelsea, sagði frá því hvernig þetta var fyrir leikmenn. „Við vorum af þeirri kynslóð að á fyrsta degi undirbúningstímabilsins myndirðu fara í hlaupaskó og hlaupa í kringum völlinn. En frá fyrsta degi sagði Mourinho okkur að fara í fótboltaskóna (til að spila með boltann)," sagði Terry nýlega í viðtali. „Styrktarþjálfarinn hans var með þá hugmyndafræði að, 'Þú sérð aldrei píanóleikara hlaupa í kringum píanó'. Frá fyrsta degi vorum við að vinna með boltann."

Adams, sem núna starfar hjá knattspyrnusambandinu í Wales, segir: „Þegar Joao var að vinna í Masters-gráðunni sinni gerðum við rannsóknir og skoðuðum hvernig þeirri aðferðarfræði hefði verið hrint í framkvæmd hjá ýmsum félögum á þeim tíma. Brendan Rodgers var til dæmis hjá Swansea og hann hafði unnið með Mourinho hjá Chelsea."

Það var klárt mál frá fyrsta degi að Sacramento, sem er þrítugur, ætlaði sér stóra hluti. „Hann var nokkuð hljóðlátur, en mikill námsmaður," segir Adams. „Á hverju einasta verkefni fékk hann 80% eða meira. Það var alltaf kveikt á honum."

Vinur hans úr háskólanáminu segir: „Hann er eilítið svipaður Mourinho, sjálfsöruggur en svolítið góður með sig. Hann er góður náungi, getur verið hortugur. Enskan hans batnaði mjög á öðru og þriðja árinu."

„Það var engin önnur leið fyrir Joao. Jafnvel á þeim tíma sagði hann að hann gæti ekki unnið með ákveðnum knattspyrnustjórum vegna æfingaaðferða hans."

Adams setti upp starfsnám fyrir nemendur sína og öðlaðist Sacramento reynslu hjá akademíu Cardiff City, þar sem hann þjálfaði marga aldurshópa.

„Hann var líka mikið fyrir það að leikgreina andstæðinga," segir Adams. „Hann hafði mikinn áhuga á að læra meira um að fara inn í leiki og hann var að framleiða mjög góðar, ítarlegar skýrslur."

Sumar skýrslur hans lentu inn á borði hjá Gary Speed heitnum, sem þjálfaði landslið Wales á þeim tíma.

Mourinho njósnaði um andstæðinga fyrir Louis van Gaal hjá Barcelona, rétt eins og Andre Villas-Boas, sem hafði ekki bakgrunn sem leikmaður, gerði fyrir Mourinho hjá Chelsea. Það er mynstur þarna.

Í júní 2018 hélt Sacramento erindi á stofnfundi knattspyrnuvísindaráðstefnunnar sem haldinn var hjá Bristol City. Þar veitti hann innsýn í nálgun sína. „Hann talaði um ávinninginn að því að greina svipmynd af uppstillingu andstæðingsins eða taktískri tilhneiginga, og byggja síðan æfingar þínar út frá því," segir Adams sem mælti einnig á ráðstefnunni. „Þú heldur að þetta sé auðskilið, en það eru ekki margir að gera þetta í eins miklum smáatriðum."

Háskólavinurinn segir: „Það var aðeins einn staður fyrir Joao og það var Meistaradeildin."

Sacramento náði þangað í apríl 2014 þegar hann var ráðinn sem yfirleikgreinandi andstæðinga hjá Mónakó. Luis Campos, sem var þá yfirmaður íþróttamála hjá Mónakó, réði hann. Talið er að Campos komi frá Barcelos, sama bæ í Portúgal og Sacramento, en það var engin frændrægni við ráðninguna. Sacramento fékk fund með Campos og hreif hann með glærusýningu af vinnu sinni. Sacramento leikgreindi andstæðinga fyrst fyrir Claudio Ranieri, og svo fyrir Leonardo Jardim.

Í janúar 2017 var franska félagið Lille keypt af Gerard Lopez og eitt af hans fyrstu verkum var að ráða Campos sem yfirmann íþróttamála. Og eitt af fyrstu verkum Campos var að ná í Sacramento frá Mónakó. Hann kom til Lille inn í þjálfarateymið með sérstaka áherslu á myndbandsgreiningu. En þegar Marcelo Bielsa var ráðinn sem knattspyrnustjóri í maí 2017, varð Sacramento fórnarlamb í valdabaráttunni á milli Campos og nýja stjórans. Snemma í september 2017 tók Bielsa þá ákvörðun að setja Sacramento frá aðalliðinu.

Bielsta entist aðeins í 13 leiki, og í nóvember 2017 var hann settur í bann hjá Lille. Hann var síðar rekinn. Sacramento, enn aðeins 29 ára, var einn af fjórum til að stýra aðalliðinu eftir að Bielsa var settur í bann. Leikmennirnir voru fljótt ánægðir með Sacramento. Þeim fannst hann þægilegri en Bielsa, með minni hugmyndafræðilegri leikstíl, og voru þeir hrifnir af getu hans að þjálfa á frönsku, spænsku og portúgölsku. „Með Bielsa snerust æfingarnar mikið um stöður, miklar endurtekningar," sagði varnarmaðurinn Adama Soumaoro. „Hjá Joao var meira spilað, við snertum boltann meira."

Fyrsti leikurinn tapaðist, en Sacramento stýrði svo Lille til 2-1 sigurs gegn Lyon. Hann yfirgaf leikstíl Bielsa og spilaði liðinu djúpt á vellinum og beitti skyndisóknum. „Hann gefur okkur sjálfstraust, hann talar mikið við okkur, hann styður alltaf við bakið á okkur," sagði varnarmaðurinn Kevin Malcuit. Og þegar Christophe Galtier var ráðinn þjálfari Lille í desember 2017 var Sacramento ráðinn aðstoðarþjálfari hans. Hann var greinilega vel metinn í því hlutverki því Galtier var allt annað en sáttur með að missa hann til Tottenham.

Zinedine Zidane var hrifinn af vinnubrögðum Sacramento og reyndi að fá hann í þjálfarateymi Real Madrid.

Það er greinilegt að Mourinho, sem telur Campos sem náinn vinn sinn, var einnig að fylgjast með. Hann var 11 mánuði án starfs eftir að hann var rekinn frá Manchester United og sást oft á leikjum Lille. Núna verða þeir saman á bekknum hjá Tottenham, ásamt öðrum þjálfara frá Lille, markvarðarþjálfaranum, Nuno Santos, og tveimur úr þjálfarateymi Mourinho hjá Manchester United, styrktarþjálfaranum Carlos Lalín og leikgreinandanum, Giovanni Cerra.

Tottenham mætir West Ham í fyrsta leik Mourinho og Sacramento á morgun.

Byggt á grein The Athletic.

STUÐNINGSSVEIT
FÓTBOLTA.NET

Okkur er full alvara!

Umfjöllun síðustu daga hefur Fótbolti.net sýnt að við ætlum að bæta í umfjöllun um fótbolta.

Okkur er full alvara með það!

Gakktu í stuðningssveitina og hjálpaðu okkur að tryggja áframhaldandi öfluga umfjöllun um fótbolta.

STYRKJA

Tweet

Senda a Facebook Hafdu samband Senda frétt Prenta frétt Frétta leit