Lið 4. umferðar: Þrjár úr Val og Breiðabliki

Sonný Lára Þráinsdóttir stendur í markinu eftir 4-1 sigur Breiðabliks á Þór/KA. Liðsfélagar hennar þær Áslaug Munda Gunnlaugsdóttir og Agla María Albertsdóttir eru einnig í liði umferðarinnar. Báðar skoruðu þær eitt mark í leiknum.

Mexíkóinn, Renae Nicole Cuellar náði sér loksins á strik fyrir Stjörnuna og skoraði og lagði upp fyrir liðið í 3-1 sigrinum á Fylki. Þá var Jasmína Erla Ingadóttir öflug á miðjunni gegn sínu gamla félagi.

Ingunn Haraldsdóttir stýrir vörninni eftir flottan leik í fyrsta sigri KR í sumar. KR lagði ÍBV 2-1 þar sem Ingunn skoraði annað mark KR í leiknum. Þá er Ásdís Karen Halldórsdóttir í liði umferðarinnar aðra umferðina í röð.

Stelpurnar hans Péturs Péturssonar í Val fóru illa með HK/Víking og unnu sannfærandi 4-0 sigur. Valur á þrjá fulltrúa í liði umferðarinnar. Elísa Viðarsdóttir, Fanndís Friðriksdóttir og Elín Metta Jensen eru fulltrúar Vals. Elín Metta er í liði umferðarinnar í þriðja sinn í sumar.

Þrátt fyrir að hafa aðeins spilað 25 mínútur í umferðinni þá er Hólmfríður Magnúsdóttir í liði umferðarinnar en hún gerði sér lítið fyrir og lagði upp eitt og skoraði annað mark í mikilvægum 3-2 sigri Selfoss á Keflavík.

Sjá einnig:
Lið 3. umferðar
Lið 2. umferðar
Lið 1. umferðar