„Það er lítið að gerast en það er alltaf bjartsýni um að það fari eitthvað að skýrast," sagði Klara Bjartmarz, framkvæmdastjóri KSÍ, við Fótbolta.net í dag.

„Það er starfshópur starfandi og KSÍ, ríki og borg funda reglulega. Vonandi styttist í að það verði einhverjir kostir lagðir fram og tekin ákvörðun."

Spilað á Laugardalsvelli í mars ef þess þarf
Ísland á ennþá möguleika á að ná 2. sætinu af Tyrkjum í undankeppni EM en til þess þarf Ísland að ná fullu húsi stiga í næsta mánuði og Tyrkir að misstíga sig gegn Andorra. Ef Ísland nær ekki beinu sæti á EM er Þjóðadeildarumspil framundan þar sem undanúrslitin verða á Laugardalsvelli í mars.

Árið 2013 mættust Ísland og Króatía í umspili fyrir HM í nóvember á Laugardalsvelli. Fyrir þann leik var lagður hitadúkur eða hitapylsa yfir völlinn og sama leið verður líklega farinn ef Ísland spilar heimaleik í mars.

„Plan A er að fara beint á EM en plan B er að spila heimaleik í umspili og spila þann leik á Laugardalsvelli," sagði Klara en verið er að skoða hvaða er hægt að gera til að hafa grasið á Laugardalsvelli í góðu standi í mars.

„Við erum byrjuð að skoða það. Kiddi (Kristinn Jóhannsson, vallarstjóri) er að kíkja í kringum sig og sjá hvaða lausnir eru í boði. Við gætum farið svpaða leið og síðast með því að setja tjald yfir völlinn og þess háttar en við byrjum á að klára nóvember verkefnið," sagði Klara.