Gylfi Þór Sigurðsson bar fyrirliðabandið er Everton heimsótti Southampton í fyrsta leik dagsins í ensku úrvalsdeildinni.

Gylfi Þór og félagar virtust ekki klárir í slaginn því Southampton komst í tveggja marka forystu og leiddi verðskuldað í leikhlé. Gylfi Þór átti sök í öðru markinu þar sem hann missti af skallabolta.

James Ward-Prowse skoraði fyrra markið eftir gott samspil við Danny Ings og tvöfaldaði Che Adams forystuna átta mínútum síðar eftir fyrirgjöf frá Ings, sem lagði tvö mörk upp í sama leiknum í fyrsta sinn á úrvalsdeildarferlinum.

Carlo Ancelotti skipti Alex Iwobi út fyrir Bernard í leikhlé en þegar skiptingin virtist ekki bera tilætlaðan árangur tók hann Abdoulaye Doucouré og Gylfa Þór Sigurðsson einnig af velli. Tólf mínútum síðar fékk Lucas Digne að líta beint rautt spjald fyrir klunnalegt brot á Kyle Walker-Peters.

Southampton verðskuldaði sigurinn fyllilega gegn döpru liði Everton. Southampton er komið upp að hlið Leeds og Crystal Palace, með tíu stig eftir sex umferðir.

Everton deilir toppsætinu með nágrönnum sínum í Liverpool, með þrettán stig.