Sky Sports segir frá þessu og tekur hinn áreiðanlegi Fabrizio Romano undir það. Hann segir að Spurs sé nú í viðræðum við PSV og það sé vonast til að samkomulag náist á næstu klukkutímum. Hjá Tottenham sé fólk vongott um að það takist.

Bergwijn er 22 ára gamall og á sjö landsleiki fyrir Holland. Hann er ekki í hóp PSV í leik gegn Twente sem er núna í gangi.

Hann skoraði 15 mörk í 41 leik á síðasta tímabli, en á þessu tímabili hefur hann skorað sex mörk í 26 leikjum.

Romano segir einnig að Tottenham sé að reyna að fá Willian Jose, sóknarmann Real Sociedad. Samkomulag er ekki í höfn. Krzysztof Piatek, sóknarmaður AC Milan, er líka möguleiki.

Tottenham hefur nú þegar fengið Gedson Fernandes frá Benfica í þessum janúarglugga, en félagið virðist ætla að styrkja sig enn frekar áður en glugginn lokar síðar í vikunni.

Aftur á móti þá er búist við því að Christian Eriksen yfirgefi Tottenham og fari til Inter. Hinn 27 ára gamli Eriksen er á förum fyrir 16,8 milljónir punda. Samningur hans við Tottenham á að renna út næsta sumar.

Tottenham vill frekar selja hann núna en missa hann á frjálsri sölu næsta sumar.