Viktor Örlygur skoraði sitt fyrsta mark í deildinni sem reyndist sigurmark leiksins
Víkingur er með fjögurra stiga forystu á toppi Bestu deildar karla eftir að liðið vann toppslaginn gegn Vestra, 1-0, á Kerecis-vellinum á Ísafirði í dag.
Jafnræði var með liðinum í fyrri hálfleiknum. Víkingar voru aðeins meira með boltann en Vestri kom sér einnig í fínar stöður.
Á 26. mínútu leiksins kom sigurmark leiksins. Eiður Aron Sigurbjörnsson braut á Tarik Ibrahimagic, sem var að spila gegn sínu gamla félagi, og vítaspyrna dæmd.
Viktor Örlygur Andrason skoraði með föstu skoti úr spyrnunni sem var hans fyrsta deildarmark á tímabilinu.
Rúmum tíu mínútum síðar gat Nikolaj Hansen tvöfaldað forystuna er hann tók á móti boltanum inn í teignum, en skotið langt framhjá markinu.
Heimamenn fóru að ógna næstu mínútur. Silas Songani átti hörkuskot og stuttu eftir það fengu þeir draumastöðu er Vladimir Tufegdzic var sendur í gegn, en rangstaða dæmd.
„Tufa sendur í gegn og leggur boltann fyrir markið. Flaggið á loft en það er einfaldlega kolrangur dómur. Davíð Atla spilar hann réttstæðan og Vestramenn skiljanlega ósáttir enda frábær staða sem þeir voru að komast í,“ sagði Sverrir Örn Einarsson í textalýsingu sinni hér á Fótbolta.net.
Víkingar sluppu með skrekkinn og fóru inn í hálfleikinn með eins marks forystu.
Gestirnir héldu ágætlega í boltann í þeim síðari og náðu að halda Vestra-mönnum niðri.
Fimmtán mínútum fyrir leikslok fengu Víkingar aukaspyrnu á stórhættulegum stað. Gylfi Þór Sigurðsson tók spyrnuna sem Guy Smit tókst að verja aftur fyrir endamörk.
Vestri átti nokkur hættuleg augnablik á lokakaflanum en besta færið fékk Guðmundur Páll Einarsson seint í uppbótartíma eftir sendingu frá nafna sínum Guðmundi Arnari Svavarssyni en Oliver Ekroth kastaði sér fyrir skotið á síðustu stundu.
Lokatölur 1-0 fyrir Víking sem er með 20 stig á toppnum, fjórum meira en Vestri sem er í öðru sæti.
Besta-deild karla
| Lið | L | U | J | T | Mörk | mun | Stig |
|---|---|---|---|---|---|---|---|
| 1. Víkingur R. | 9 | 6 | 2 | 1 | 18 - 8 | +10 | 20 |
| 2. Vestri | 9 | 5 | 1 | 3 | 11 - 5 | +6 | 16 |
| 3. Breiðablik | 9 | 5 | 1 | 3 | 14 - 15 | -1 | 16 |
| 4. Valur | 9 | 4 | 3 | 2 | 20 - 12 | +8 | 15 |
| 5. Stjarnan | 9 | 4 | 1 | 4 | 16 - 17 | -1 | 13 |
| 6. Fram | 9 | 4 | 0 | 5 | 15 - 15 | 0 | 12 |
| 7. ÍBV | 9 | 3 | 2 | 4 | 9 - 15 | -6 | 11 |
| 8. KA | 9 | 3 | 2 | 4 | 9 - 16 | -7 | 11 |
| 9. KR | 9 | 2 | 4 | 3 | 26 - 22 | +4 | 10 |
| 10. FH | 9 | 3 | 1 | 5 | 15 - 14 | +1 | 10 |
| 11. Afturelding | 9 | 3 | 1 | 5 | 8 - 13 | -5 | 10 |
| 12. ÍA | 9 | 3 | 0 | 6 | 12 - 21 | -9 | 9 |
Athugasemdir
