Þorsteinn Halldórsson, landsliðsþjálfari.
Fanndís Friðriksdóttir.
„Tilfinningin er bara góð. Ég held að við séum klár í þetta. Verður hörkuleikur en við förum með jákvætt hugarfar inn í leikinn og stefnum á að vinna hann," sagði Þorsteinn Halldórsson, landsliðsþjálfari, þegar hann ræddi við Fótbolta.net á Lerkendal í Þrándheimi í morgun.
Ísland spilar á morgun við Noreg í Þjóðadeildinni á Lerkendal. Liðin mættust fyrir stuttu í Laugardalnum og þá endaði leikurinn með markalausu jafntefli.
Ísland spilar á morgun við Noreg í Þjóðadeildinni á Lerkendal. Liðin mættust fyrir stuttu í Laugardalnum og þá endaði leikurinn með markalausu jafntefli.
„Í grunninn getum við tekið margt sem við vorum að gera í þeim leik og flutt það yfir í þennan. En auðvitað er þetta bara nýr leikur. Við þurfum að vera tilbúin í eitthvað sem þær breyta. Ef þær halda sínu skipulagi þá höfum við séð ákveðna veikleika sem við getum nýtt okkur."
„Það hefur gengið ágætlega heilt yfir, en auðvitað vonbrigði að Emilía meiddist á æfingu í fyrradag. Það getur gerst. Undirbúningurinn hefur gengið vel og allar aðrar eru klárar í þetta," sagði Steini.
Fanndís í hópnum í fyrsta sinn í fimm ár
Þjálfarinn hefur þurft að gera tvær breytingar á hópnum fyrir leikinn. Amanda Andradóttir og Emilía Kiær Ásgeirsdóttir duttu út vegna meiðsla en inn í þeirra stað komu Arna Eiríksdóttir og Fanndís Friðriksdóttir. Sú síðarnefnda er í landsliðshópnum í fyrsta sinn í fimm ár.
„Þetta er bara partur af þessu. Við erum klár í það þegar við þurfum að gera breytingar," segir Steini.
„Fanndís hefur verið fín með Val og verið þeirra helsta vopn fram á við. Ég taldi að hennar reynsla og geta geti nýst okkur í þessu verkefni. Hún hefur verið í huga okkar undanfarið. Við ákváðum að taka hana inn núna og ég hef fulla trú á því að Fanndís geti verið góð viðbót við hópinn okkar."
Fanndís kom til móts við hópinn síðastliðna nótt og var með á æfingu í morgunsárið.
„Fanndís á fullt af landsleikjum og er með reynslu úr stórum verkefnum. Vonandi getur það hjálpað okkur í þeim leikjum sem framundan eru," segir Steini. „Það var ekkert rosalega langur hugsunargangur með það hverja við ætluðum að taka inn. Hún var alveg á mörkunum að vera í hópnum núna. Við ákváðum að taka hana inn fyrst þetta gerðist. Við þurftum að taka ákvörðun einn, tveir og þrír, og við gerðum það."
Allt viðtalið má sjá í spilaranum hér að ofan þar sem Steini ræðir frekar um leikina sem framundan eru.
Athugasemdir
