,,Mikill léttir"
Þorlákur Már Árnason, betur þekktur sem Láki, var kátur eftir endurkomusigur ÍBV gegn FH í Bestu deildinni í dag.
Lestu um leikinn: ÍBV 2 - 1 FH
ÍBV var 0-1 undir í leikhlé en tókst að snúa stöðunni við í síðari hálfleik svo lokatölur urðu 2-1. Þetta tókst Vestmannaeyingum þrátt fyrir mikla yfirburði FH í fyrri hálfleik og góð færi á báða bóga eftir leikhlé.
„Það er mikill léttir að landa þessum sigri," er það fyrsta sem Láki sagði eftir sigurinn dýrmæta, sem kemur ÍBV alla leið upp í 6. sæti deildarinnar eftir að liðið hafði verið í neðsta sæti í hálfleik.
Eyjamenn eiga 11 stig eftir 9 umferðir í gríðarlega þéttum pakka eftir æsispennandi byrjun á Bestu deildinni.
„Mér fannst þetta jafn leikur nánast allan tímann en okkur langaði þetta meira. Leikmennirnir sem komu inn af bekknum gerðu gæfumuninn. Vicente (Valor) breytti leiknum, hann var svo rólegur á boltanum. Við töpuðum boltanum alltof mikið í fyrri hálfleik.
„Á endanum fannst mér við eiga skilið að sigra. Ég er gríðarlega ánægður með hugarfarið í dag, við vorum vinnusamir en það vantaði gæðin hjá okkur sérstaklega í fyrri hálfleik. Við töpuðum alltof mikið af boltum."
Láki ræddi svo um meiðslavandræði ÍBV og annað í viðtalinu sem má sjá í spilaranum hér fyrir ofan.
Athugasemdir
