GunnInga: Það er enginn krísufundur

Umgjörðin á mótinu var frábær, sérstaklega í kringum íslenska liðið.

„Ég er ótrúlega stolt af því. Við lögðum okkur mikið fram og það var ákvörðun hjá KSÍ að hafa umgjörðina í kringum liðið fyrsta flokks. Það tókst og við gerðum það vel. Það var tekið eftir því úti á mótinu og UEFA hrósaði okkur fyrir umgjörðina í kringum liðið og ég tala nú ekki um stuðningsmennina okkar.\"

„Þeir voru alveg frábærir og það er talað um frammistöðu þeirra á vefsíðum hér og þar og nú síðast hjá UEFA.\"

Sjá einnig:
„Keppni sem Ísland vill gleyma en stuðningurinn magnaður\"

„Síðan verð ég náttúrlega að hrósa ykkur, ykkur fjölmiðlamönnum. Þið fáið 10 í einkunn fyrir ykkar frammistöðu.\"

„Þetta er eitthvað sem við höfum aldrei upplifað áður með kvennaboltann, svona mikla og góða umfjöllun.\"

Eins og allir vita þá tapaði Ísland öllum sínum leikjum á mótinu, en GunnInga segir að þrátt fyrir það verði enginn krísufundur.

„Það eru spennandi ár framundan. Það er nú enginn krísufundur, nú er allir að slaka á og hlaða batteríin. Síðan munum við setjast niður og fara yfir mótið í heild sinni. Það er alltaf gott að skrifa hluti niður þegar þeir eru í fersku minni, ekki þegar það er hálft ár í næsta stórmót. Maður getur alltaf punktað hjá sér.\"

„Auðvitað setjumst við niður og ræðum gengi liðsins, en ég segi að við þurfum að líta fram á veginn. Undankeppni HM byrjar í september og ég er ekki smeyk við framhaldið.\"

Hún vill hafa Frey Alexandersson áfram í starfi þjálfara kvennalandsliðsins.

„Freyr er náttúrulega með samning við okkur og ég get alveg sagt ykkur að ég hef engan áhuga á því að skipta um þjálfara.\"

Næsta verkefni eru Færeyjar í undankeppni HM á heimavelli, en GunnInga vonast til þess að sjá Laugardalsvöll þétt setinn í september. Hana dreymir um að það verði uppselt á kvennalandsleik einn daginn.

„Það er spennandi verkefni, Færeyjar. Þetta er í fyrsta sinn þar sem þær eru í riðlakeppninni og þær byrja á að koma hingað til Íslands. Það verður gleðistund.\"

„Ég vona að þeir áhorfendur sem fylgdu okkur í Hollandi og þeir sem komu ekki til Hollands mæti á Laugardalsvöllinn og hefji nýja undankeppni með liðinu,\" sagði hún að lokum.

„Mig dreymir um að það verði uppselt á kvennaleik einn daginn.\"

Viðtalið má sjá í heild sinni í spilaranum hér að ofan, en þar ræðir hún nánar um EM, stuðninginn, dómaramálin og fleira.