Lennon skoraði þrjú og lagði upp eitt.
„Þetta var góður leikur, nokkur mörk svo ég er mjög ánægður," sagði Steven Lennon sem var frábær í liði FH í 4-2 sigri á Leikni í kvöld, skoraði þrjú og lagði upp eitt.
Lestu um leikinn: FH 4 - 2 Leiknir R.
„Ég var bara búinn að skora eitt mark í fyrstu fimm leikjunum svo ég var ákveðinn í að skora fleiri í dag. Vonandi heldur það áfram en það mikilvægasta er að vinna leikinn og fá fleiri stig."
„Þetta var mjög erfitt, við vissum að þeir myndu koma og berjast. Við áttum von á því og vanmátum þá ekki. Við spiluðum ekki okkar besta leik en skoruðum fjögur góð mörk og ég held við séum á toppi deildarinnar svo vonandi getum við haldið því áfram í sumar."
Mikil spenna var síðustu mínútur leiksins þar sem Leiknismenn sóttu stíft í stöðunni 3-2 eða þar til Lennon skoraði úr lokasókn FH úr víti fjórða markið.
„Staðan var 3-2 og það var alltaf spenna. Við vorum samt í betri stöðu, við hefðum getað gert okkur þetta auðveldara, ég átti að skora 1-2 fleiri mörk. En svona gerist þetta í fótboltanum og ég er ánægður með að hafa fengið þrjú stig."
Lennon lá í grasinu í öðru marki FH, en reif sig upp og skoraði með bakfallsspyrnu þaðan sem hann lá.
„Atli sendi fyrir og ég reyndi að skjóta með vinstri fæti, þeir vörðust og ég lá í grasinu, boltinn var uppi þegar ég lá í grasinu og fór upp og skaut afturfyrir mig. Sem betur fer var þetta mark, ég var virkilega ánægður þegar hann fór inn."
Í þriðja marki FH gerði Lennon svipað þar sem hann lá í grasinu en þá var það stoðsending.
„Það er alltaf gaman að skora og leggja upp sem sóknarmaður en ég vil bara reyna að fá stig fyrir FH, ná árangri í deildinni og vinna hana í ár. Ég er líka mjög ánægður með þrennuna, auðvitað."
