Hvað segir Guðlaugur?
Guðlaugur Baldursson er sérstakur álitsgjafi okkar um Landsbankadeild karla. Guðlaugur er þjálfari ÍR sem leikur í 2. deildinni og gerði liðið að Reykjavíkurmeisturum fyrr í vetur. Hann hefur áður þjálfað ÍBV í Landsbankadeildinni.

Hér að neðan má sjá álit Guðlaugs á KR.

Um KR:
KR verður með mjög sterkt lið í sumar og ég held að þeir verði vafalítið í toppbaráttu. Þeir eru með gríðarlega reynslumikinn og öflugan þjálfara og eru búnir að fá góða menn til liðs við sig sem passa vel inn í það sem þeir virðast ætla að gera. Þjálfarinn tilkynnti, ef ég man rétt, að þeir ætla að spila 4-4-2 og það hentar þessari blöndu leikmanna örugglega mjög vel.

Styrkleikar:
Þeir eru með marga möguleika í sókninni og ég held þar verði þeir jafnvel sterkastir. Logi var reyndar þekktur fyrir það þegar hann var í Kaplakrika að hann gat og getur líka látið menn verjast vel og byggt upp góðan varnarpakka… þegar þetta tvennt fer saman er von á góðum árangri.

Veikleikar:
Mér hefur stundum fundist KR vera með of líka leikmenn í sumum leikstöðum. En það er spurning hvort þjálfarinn hefur ekki fundið lausnina á því með þeim leikmönnum sem hann fengið til liðsins. Svo líka það að í Frostaskjóli hefur alltaf verið gríðarlega mikil utanaðkomandi pressa og óþolinmæði ef ekki gengur vel í fyrstu leikjunum og það hefur svo valdið því í framhaldinu að það gengur illa allt tímabilið. Það er því mikilvægt fyrir KR að byrja vel.

Gaman að fylgjast með:
Það verður virkilega athyglisvert að sjá hvort Guðjón Baldvinsson hefur ekki örugglega styrkinn í að verða alvöru úrvalsdeildarleikmaður. Þetta er hans fyrsta ár í úrvalsdeild og það verður virkilega gaman að fylgast með honum. Ég hef tröllatrú á að hann muni gera frábæra hluti fyrir KR.

Lykilmaður:
Menn eins og Gunnlaugur Jónsson sem stýrir þeirra varnarleik og er algjört akkeri þar og svo held ég að Viktor Bjarki eigi eftir að stýra sóknarleiknum og fara mikinn enda held ég að hann sé ólmur í að sýna sig aftur eftir hálf magran tíma í Noregi.

Þjálfarinn:
Logi Ólafsson þjálfar KR nú á sínu fyrsta heila tímabili en hann hafði tekið við liðinu á miðju tímabili í fyrra er Teitur Þórðarson yfirgaf félagið. Logi hafði þá ekki þjálfað félagslið hér á landi síðan hann stýrði FH um aldamótin en hann kom liðinu þá í efstu deild á ný eftir mörg ár í næst efstu deild og stýrði liðinu til þriðja sætis í efstu deild árið 2001. Hann hóf þjálfaraferil sinn árið 1987 er hann þjálfaði kvennalið Vals í tvö ár en þaðan lá leiðin til Víkinga sem hann þjálfaði árin 1990-1992 og gerði liðið að Íslandsmeisturum 1991.

1993-1994 þjálfaði hann kvennalandslið Íslands og árið 1995 stýrði hann ÍA og gerði liðið að Íslandsmeisturum. Árið eftir tók hann við landsliði Íslands og stýrði þeim 1996-1997 og fór þaðan aftur til ÍA 1997 og 1998.

Hann tók svo við FH og stýrði liðinu ásamt því að stýra kvennalandsliðinu árið 2000. Hann hætti hjá FH eftir tímabilið 2001 og varð aðstoðarþjálfari Lilleström. Hann tók svo aftur við Íslenska landsliðinu eftir að hann kom heim og stýrði liðinu ásamt Ásgeiri Sigurvinssyni árin 2003-2005.

Líklegt byrjunarlið KR í upphafi móts: