Guðjón Árni Antoníusson skoraði tvö mörk gegn Selfyssingum í Kaplakrika í kvöld og var ánægður með sigurinn eftir leikinn.
Guðjón viðurkennir að þetta hafi verið erfið fæðing en í síðari hálfleik tóku FH-ingar öll völd og gerðu út um leikinn.
Guðjón viðurkennir að þetta hafi verið erfið fæðing en í síðari hálfleik tóku FH-ingar öll völd og gerðu út um leikinn.
,,Ég er bara mjög ánægður með að ná í þrjú stig, mjög gott að skora fimm mörk, ekki nógu gott að fá á sig tvö. Þannig að plúsarnir eru fleiri en mínusarnir og við erum sáttir.
,,Leikurinn er 90 mínútur og þeir börðust eins og ljón í fyrri hálfleik. Eftir að við setjum mark í 2-1 í byrjun seinni þá fannst mér dofna aðeins yfir þeim. Mér fannst við eiga seinni hálfleik frá A til Ö."
FH er nú á toppnum eftir að KR tapaði fyrir ÍBV fyrr í dag og skilja tvö stig liðin að, en FH á leik til góða á KR og getur því komist í fimm stiga forskot.
,,Það er gott að vera á toppnum. Við förum í hvern leik til að vinna hann og það breytist ekkert eftir þetta."
Guðjón skoraði tvö mörk í leiknum og segir að liðsfélagarnir hafi ekki viljað leyfa varnarmanni að skora þrennu í leiknum þar sem hann er kominn í harða markasamkeppni við miðju- og sóknarmenn FH.
,,Þeir hættu að gefa á mig um leið og ég var kominn með tvö, þá bara var ég inni í teignum aleinn og það nennti enginn að gefa á mig."
