„Það er blendin tilfinning," sagði Þorlákur Árnason þjálfari Þórs eftir 2-0 tap liðsins gegn Selfossi í Lengjudeildinni í kvöld.
Þorlákur var ánægður með leik sinna manna þrátt fyrir tapið.
Lestu um leikinn: Þór 0 - 2 Selfoss
„Þetta var góður leikur hjá Þórsliðinu. Við sköpuðum okkur nóg af færum til að vinna leikinn. Við hefðum mátt vera aðeins grimmari í vitateig andstæðingana, í heildina ánægður með spilamennskuna, baráttuna og sköpuð færi en gríðarleg vonbrigði að tapa,"
„Það voru bara þessi tvö slútt hjá þeim, frá Tokic og Gonza [Gonzalo Zamorano] sem var munurinn á liðunum. Þú getur ekki beðið þá um að skapa sér mikið fleiri færi en við gerðum í leiknum í heild sinni til að vinna,"
Þorlákur hefur verið ánægður með spilamennsku liðsins í síðustu tveimur leikjum en vill sjá fleiri stig. Honum fannst iðið sakna Bjarna Guðjóns Brynjólfssonar í kvöld.
„Uppskeran mætti vera betri, spilamennskan á Ísafirði og í dag var fín. Við vorum án Bjarna, hann er í verkefni með u19 ára landsliðinu og spilaði frammi gegn Vestra og gerði það vel. Ég fann að það var erfitt að leysa það,"
Gary Martin fyrirliði Selfyssinga var á gulu spjaldi þegar hann tók Hermann Helga Rúnarsson niður. Þorláki fannst að hann hefði átt að fá rautt í leiknum.
„Það er með ólíkindum að hann hafi klárað þennan leik og farið útaf sem varamaður, það var ástæðan fyrir því að hann var tekinn útaf. Það var virðingaleysi við leikinn að hann var ekki sendur í sturtu, dómarinn hafði nóg af tækifærum til þess," sagði Þorlákur.
