Erling Haaland og Robert Lewandowski eru tveir af heitustu framherjum heims og mættust þeir þegar þessi lið áttust við.

Haaland hafði skorað 17 mörk í deildinni fyrir leikinn í kvöld en Lewandowski mun meira eða 28 stykki.

Það er athyglisvert að skoða ummæli sem Haaland lét falla í vikunni er hann var spurður út í samkeppnina við Lewandowski þegar kemur að markaskorun.

„Um leið og ég skora mark þá hugsa ég með mér að ég sé að nálgast hann á listanum og svo strax eftir það er hann búinn að skora þrennu!" sagði Haaland í vikunni.

Það er nákvæmlega það sem gerðist í þessum eina leik en Haaland skoraði fyrst tvö mörk fyrir Dortmund til að koma liðinu í 2-0.

Sú forysta dugði liðinu þó ekki en Lewandowski skoraði einmitt þrennu fyrir heimamenn og Leon Goretzka gerði þá eitt.

Lewandowski er nú kominn með 31 mark og er Haaland með 19.