Abde Ezzalzouli og Cédric Bakambu skoruðu fyrir Betis í jöfnum fyrri hálfleik. Þeir nýttu færin sín mjög vel og juku gestirnir kraftinn í síðari hálfleik en tókst ekki að bæta marki við.

Þess í stað minnkaði Vedat Muriqi muninn með mögnuðum skalla en heimamenn komust þó ekki nær. Niðurstaðan verðskuldaður sigur Betis sem er aðeins fjórum stigum frá Atlético Madrid og Villarreal í baráttunni um meistaradeildarsæti.

Antony var á sínum stað í byrjunarliði Betis og átti mjög góðan leik. Hann lagði upp fyrir Bakambu og var afar líflegur.

Mallorca situr í fallsæti eftir tapið, með 24 stig eftir 24 umferðir.

Fyrr í dag tókst Valencia að bera sigur úr býtum á útivelli gegn Levante í fallbaráttunni. Fyrri hálfleikurinn var dapur og voru það heimamenn sem gerðu sig líklegri til að skora.

Síðari hálfleikurinn var áfram tíðindalítill en gestunum frá Valencia tókst að skora tvö mörk þökk sé einstaklingsgæðunum sem felast í Largie Ramazani og Umar Sadiq.

Ramazani skoraði magnað mark eftir að hafa fengið erfiða sendingu með skoppandi bolta, áður en Sadiq bolaði varnarmanni Levante frá til að hirða boltann og innsigla sigurinn.

Bæði mörkin komu eftir skyndisóknir og voru leikmenn Levante æfir yfir því að dómari leiksins hafi ekki dæmt brot á Sadiq þegar hann stal boltanum.

Lokatölur 0-2 og er Valencia með 26 stig eftir 24 umferðir, aðeins tveimur stigum fyrir ofan fallsvæðið.

Levante situr eftir með 18 stig og þarf að bæta sinn leik til muna til að halda sér uppi í efstu deild.

Mallorca 1 - 2 Betis
0-1 Abde Ezzalzouli ('18 )
0-2 Cedric Bakambu ('45+2 )
1-2 Vedat Muriqi ('66 )

Levante 0 - 2 Valencia
0-1 Largie Ramazani ('64 )
0-2 Umar Sadiq ('84 )
Rautt spjald: Kervin Arriaga, Levante ('95)