„Þetta var erfitt," sagði miðjumaðurinn Georginio Wijnaldum eftir 3-1 tap Liverpool gegn Real Madrid í átta-liða úrslitum Meistaradeildarinnar í kvöld. Þetta var fyrri leikur liðanna og fór hann fram á Spáni.
„Við spiluðum gegn góðu liði og vorum ekki nægilega góðir í fyrri hálfleik. Við töpuðum boltanum fljót í einföldum sendingum. Það komu upp tvo augnablik þar sem við einbeittum okkur ekki nægilega mikið og þeir skoruðu."
Liverpool var 2-0 undir í hálfleik en byrjaði seinni hálfleikinn vel og minnkuðu muninn. Þeir náðu hins vegar ekki að fylgja því nægilega vel eftir.
„Við töluðum um það í hálfleik að við yrðum að spila okkar leik, hætta að tapa boltanum auðveldlega og einbeita okkur meira. Þeir voru hættulegir með löngum boltum. Við spiluðum okkar leik á ákveðnum augnablikum í seinni hálfleik og þess vegna skoruðum við. Því miður skoruðu þeir aftur og það gerir okkur erfiðara fyrir," sagði Wijnaldum en seinni leikurinn fer fram í næstu viku.
Athugasemdir