Guðlaugur Victor Pálsson skoraði eitt af mörkum Íslands í 3-1 sigri gegn Skotlandi í æfingaleik ytra í kvöld. Hann mætti þreyttur í viðtal eftir leikinn.
Lestu um leikinn: Skotland 1 - 3 Ísland
„Þetta er búið að vera mjög áköf vika með myndbandsfundum. Við fáum ekki margar æfingar þannig fundirnir eru búnir að ver stífir. Það var jákvætt að við gátum sýnt framfarir í dag," sagði Gulli en liðið tapaði gegn Kósovó í tveimur leikjum í síðasta landsliðsverkefni.
Gulli fann ekki fyrir pirring frá leikmönnum Skotlands.
„Meira frá áhorfendum. Maður fann það þegar markmaðurinn meiðist, það var jákvætt fyrir okkur og hann kemur kaldur inn í leikinn. Það gaf okkur blóð á tennurnar og fórum að pressa á þá," sagði Gulli.
Cieran Slicker, markvörður Skotlands, kom inn á snemma leiks í sínum fyrsta landsleik og átti mjög erfitt uppdráttar.
„Já, maður hálf vorkenndi honum ef ég á að vera alveg hreinskilinn," sagði Gulli.
Gulli skoraði þriðja mark liðsins snemma í seinni hálfleik.
„Albert kemur með frábæran bolta inn og ég teygi mig, það var mjög sætt að sjá hann inni. Svo var óvissa hvort þetta væri rangstaða eða ekki, ég var mjög ánægður að svo var ekki," sagði Gulli.
Athugasemdir
