Jón Sveinsson.
„Þetta var orðinn hálfgerður róluvalla fótbolti, fram og til baka. Dauðafæri á báða bóga en hvorugt liðanna náði að troða inn sigurmarkinu," sagði Jón Sveinsson þjálfari Fram eftir 1-1 jafntefli gegn Stjörnunni í 4. umferð Bestu deildarinnar.
Lestu um leikinn: Stjarnan 1 - 1 Fram
„Við berum virðingu fyrir þessu stigi. Við erum að spila gegn góðu liði og þeir hafa byrjað mótið vel. Við þurftum að hafa fyrir þessu stigi í dag. En það er súrt að ná ekki að halda þetta út eftir að hafa komist yfir."
Framarar fengu tækifæri undir lok fyrri hálfleiks að komast í 2-0 en Tryggvi Snær Geirsson fór illa af ráði sínu.
„Þú færð færi og þú verður að klára þau. Sömuleiðis fengu þeir færi. Við hefðum viljað klára þennan leik, ekki spurning," sagði Nonni sem var ánægður með hvernig liðið byrjaði leikinn og var að spila í fyrri hálfleik.
„Við byrjuðum mjög vel. Við höfum byrjað síðustu tvo leiki mjög vel og komist yfir og síðan sest svolítið niður og farið að verja forystuna. Það er kannski ekkert óeðlilegt fyrir nýliða. Það er aðeins öðruvísi pressa að spila þessa leiki heldur en í Lengjudeildinni."
„Við tökum stiginu og erum ánægðir með það," sagði Jón Sveinsson þjálfari Fram.
Athugasemdir
