Hermann Hreiðarsson
Hermann Hreiðarsson, þjálfari ÍBV, var hress og kátur eftir 1-0 sigurinn á Fram og skiljanlega en hann segir að strákarnir hafi gert þetta fyrir alla Eyjamenn, bæði nær og fjær.
Lestu um leikinn: ÍBV 1 - 0 Fram
Fimmtíu ár eru liðin frá gosinu í Eyjum og fer nú fram Goslokahátíðin en þar koma Eyjamenn saman og skemmta sér hátíðlega.
ÍBV var alltaf líklegt til að skora fleiri mörk en létu eitt duga í dag.
„Við vorum frábærir í þessum leik og það var rosalegur kraftur, orka og baráttuandi sem einkennir Eyjuna fyrst og fremst. Þvílíkur dagur og Goslokahátíð og hérna barðist fólk fyrir lífi sínu nánast, þetta var fyrir Eyjamenn og eyjuna og við endurspegluðum tíðarandann með þessum baráttusigri og góðri spilamennsku. 3-0 eða 4-0 hefði verið sanngjarnt.“
„Sérstaklega þegar vindurinn var farinn að aukast í seinni hálfleik og þurftum við að verjast og gera það vel og berjast fyrir þessum stigum þegar á þurfti en fram að því fengum við öll færin og áttum að fá víti. Við vorum töluvert betri aðilinn. Okkur langaði að gera þetta fyrir eyjuna og Eyjamenn að fagna þessu almennilega með okkur,“ sagði Hermann við Fótbolta.net.
Aðstæður voru góðar og var Hermann sérstaklega ánægður að geta gefið Eyjamönnum sigurinn í dag.
„Það er engin spurning. Það finnst öllum skemmtilegra að spila í góðu veðri og ekki í hífandi roki. Aðstæður voru frábærar og frábær stuðningur, margir á vellinum og orka á eyjunni og við tókum hana og átum hana. Við ætluðum okkur sigurinn í dag og kom ekkert annað til greina,“ sagði Hermann í lokin.
Athugasemdir
