Sassuolo og Torino áttust við í lokaleik dagsins í ítalska boltanum og fór leikurinn fjörlega af stað.

Andrea Pinamonti skoraði með frábærum skalla eftir fimm mínútna leik en Dúvan Zapata var búinn að jafna skömmu síðar. Bakverðirnir Marcus Pedersen og Raoul Bellanova gerðu mjög vel að leggja mörkin upp með fyrirgjöfum frá hægri kanti.

Það ríkti þokkalegt jafnræði með liðunum eftir þetta, þar sem gestirnir frá Tórínó voru hættulegri í fyrri hálfleik en heimamenn í Sassuolo hættulegri eftir leikhlé.

Torino er með 33 stig í Evrópubaráttunni, sex stigum frá Meistaradeildarsæti, á meðan Sassuolo er í fallbaráttu með 20 stig, tveimur stigum fyrir ofan fallsæti.