Það var nokkuð af Íslendingum sem komu við sögu í leikjum dagsins í Evrópu, þar sem Aron Einar Gunnarsson lék fyrstu 87 mínúturnar í sigri Al-Gharafa.
Al-Gharafa lagði Al-Kharitiyath að velli í bikarnum þar sem Joselu, fyrrum leikmaður Real Madrid, skoraði annað markið í 2-0 sigri. Aron Einar og félagar munu spila næst við Umm Salal eða Al-Ahli Doha í 8-liða úrslitum.
Sveinn Aron spilaði þá síðasta hálftímann í jafntefli Cavese gegn Salernitana í þriðju efstu deild á Ítalíu. Hann kom inn í stöðunni 0-1 og urðu lokatölur 1-1.
Cavese er aðeins tveimur stigum frá fallsvæðinu og átta stigum frá umspilssæti. Salernitana er hins vegar í toppbaráttunni.
Í þriðju efstu deild í Þýskalandi varði Lúkas Petersson mark varaliðs Hoffenheim sem tapaði gegn toppliði Verl. Hoffenheim er með 32 stig eftir 24 umferðir.
Í Króatíu voru hvorki Danijel Dejan Djuric né Logi Hrafn Róbertsson í hóp í stóru tapi hjá Istra gegn toppliði Dinamo Zagreb. Istra er í fjórða sæti með 30 stig eftir 22 umferðir.
Að lokum voru ýmsir æfingaleikir sem fóru fram þar sem ekki er mikið af upplýsingum um byrjunarlið. Júlíus Magnússon var í byrjunarliði Elfsborg sem tapaði fyrir GAIS, en þar byrjaði Róbert Orri Þorkelsson á bekknum.
Mikael Neville Anderson byrjaði inná í sigri Djurgården gegn Vålerenga og AB frá Kaupmannahöfn lagði Trelleborg að velli.
Al-Gharafa 2 - 0 Al-Kharitiyath
Cavese 1 - 1 Salernitana
Verl 3 - 1 Hoffenheim II
Dinamo Zagreb 4 - 0 Istra 1961
GAIS 2 - 0 Elfsborg
Djurgarden 2 - 1 Valerenga
Trelleborg 0 - 1 AB
Ariana 1 - 2 Hassleholms
Brommapojkarna 1 - 0 Sandviken
Kalmar 1 - 3 Norrköping
Athugasemdir
