AC Milan er í öðru sæti ítölsku deildarinnar eftir nauman sigur á útivelli gegn nýliðum Pisa.

Fyrrum Chelsea mennirnir Ruben Loftus-Cheek og Christopher Nkunku byrjuðu saman í fremstu víglínu og skoraði Loftus-Cheek fyrsta mark leiksins með skalla á 39. mínútu.

Staðan var 0-1 eftir bragðdaufan fyrri hálfleik þar sem skallamark Loftus-Cheek gerði gæfumuninn.

Nkunku var skipt af velli í upphafi síðari hálfleiks fyrir annan fyrrum úrvalsdeildarleikmann, Niclas Füllkrug, og var dæmd vítaspyrna skömmu síðar eftir að brotið var á miðverðinum Strahinja Pavlovic innan vítateigs.

Nkunku er vítaskytta Milan en hann var farinn af velli, svo Füllkrug steig á punktinn. Þjóðverjinn tók fína vítaspyrnu en Nicolas Andrade varði meistaralega frá honum.

Korteri síðar tókst Felipe Loyola að jafna metin eftir langa sendingu upp völlinn. Klaufagangur í vörn Milan gerði Loyola kleift að skora og var mikil spenna á lokakaflanum.

Milan var ekki að skapa sér mikið en reynsluboltinn Luka Modric náði að prjóna sig í gegnum vörnina til að endurheimta forystuna. Hinn fertugi Modric lék allan leikinn og hafði ennþá orkuna í að spretta innfyrir vörnina og skora á 85. mínútu.

Hann bjó markið til með aðstoð frá Samuele Ricci, þar sem hann gerði vel að koma boltanum á Ricci sem var í góðri stöðu innan vítateigs. Ricci hélt boltanum nægilega lengi til að gera Modric kleift að fá hann aftur og skora af stuttu færi.

Þetta reyndist sigurmarkið svo lokatölur urðu 1-2 þökk sé hetjunni þaulreyndu Luka Modric. Adrien Rabiot fékk gult spjald í uppbótartíma og annað gult beint í kjölfarið fyrir kjaftbrúk, svo hann missir af næsta leik.

Milan er í öðru sæti ítölsku deildarinnar, fimm stigum á eftir toppliði og nágrönnum sínum í Inter.

Smelltu hér til að kaupa áskrift að Livey