Morten Boesen, læknir danska landsliðsins, segir í samtali við danska fjölmiðla að Christian Eriksen hafi andað og verið með púls þegar læknar hlupu inn á völlinn í dag. Svo hafi hann hætt að handa og púlsinn horfið.
Eriksen, leikmaður Danmerkur, féll til jarðar undir lok fyrri hálfleiks í leik gegn Finnlandi, í fyrsta leik liðanna á Evrópumótinu.
Það er ekki annað hægt að segja en að sjúkrastarfsmenn á vellinum og liðsfélagar Eriksen séu hetjur.
Eriksen fékk skyndihjálp á vellinum og var svo fluttur á sjúkrahús þar sem líðan hans er stöðug.
„Ég vil byrja á því að segja að ég er ekki búinn að tala við Christian eða fjölskyldu hans... þegar við komum að honum þá var hann í hliðarlegu, andaði og var með púls. Fljótlega breytist staðan og við hefjum hjartahnoð. Við fengum frábæra hjálp frá læknum á vellinum og öðrum sjúkrastarfsmönnum. Við náðum Christian aftur og hann talaði aðeins við mig," sagði Boesen.
Hjartalæknirinn Sadi Raza skrifar þráð á Twitter um mál Eriksen. Hann segir að miðað við sjónvarpsútsendinguna hafi Eriksen verið með hraðan, óreglulegan og óskipulagðan hjartsláttartakt sem kemur á undan hjartastoppi. Hann segir að liðsfélagar Eriksen, dómarinn og læknar hafi bjargað lífi fótboltamannsins.
Eriksen er núna í skoðun á spítala þar sem það er rannsakað nákvæmlega hvað kom fyrir. Rannsóknir munu segja til um það hver framtíð Eriksen verði í fótbolta, þó það sé aukaatriði núna. Það sem skiptir mestu máli núna er að hann er á lífi og líðan hans sé stöðug.
Thread on #ChristianEriksen Based on the tv coverage it is likely that Eriksen went into Ventricular Tachycardia/Fibrillation. This is a fast, irregular and highly unorganized electrical rhythm of the heart that precedes a cardiac arrest.
— Sadi Raza, MD FACC (@SadiRazaMD) June 12, 2021
Athugasemdir