Síðustu leikjum dagsins er lokið í evrópska kvennaboltanum þar sem Sandra María Jessen tryggði FC Köln sigur annan leikinn í röð í efstu deild þýska boltans.
Sandra skoraði tvennu í síðustu umferð til að tryggja sigur gegn Essen og í dag skoraði hún sigurmarkið gegn Union Berlin.
Köln hafði tapað fyrstu þremur leikjum deildartímabilsins en er núna með 6 stig eftir 5 umferðir.
Í hollenska boltanum kom Ragnheiður Þórunn Jónsdóttir inn af bekknum í sigri PEC Zwolle gegn Den Haag. Zwolle er með 9 stig eftir 5 umferðir, fjórum stigum á eftir toppliðum Twente og Ajax.
Ragnheiður lék síðasta hálftíma leiksins en hún er aðeins sautján ára gömul.
Á Englandi var Hlín Eiríksdóttir ónotaður varamaður í markalausu jafntefli hjá Leicester á útivelli gegn Aston Villa. Leicester er með 5 stig eftir 6 fyrstu umferðirnar á nýju tímabili.
Í Skotlandi var Telma Ívarsdóttir á sínum stað á varamannabekk Rangers, sem tapaði 3-2 gegn Hibernian og situr í 5. sæti deildarinnar eftir tvo tapleiki í röð. Rangers er þar með 16 stig eftir 8 umferðir. Telma er varamarkvörður skoska stórveldisins.
Að lokum var Kristófer Jónsson á sínum stað í byrjunarliði Triestina sem tapaði gegn Cittadella og er í miklu veseni í C-deild ítalska boltans. Liðið er búið að safna 12 stigum í 9 deildarleikjum en er þrátt fyrir það í neðsta sæti deildarinnar með -8 stig.
Triestina byrjaði með -20 stig og verður ansi þung þraut að forðast fall niður í Serie D. Markús Páll Ellertsson, yngri bróðir Mikaels Egils, var ónotaður varamaður.
Köln 2 - 1 Union Berlin
0-1 S. Weidauer ('7)
1-1 L. Vogt ('28)
2-1 Sandra María Jessen ('34)
2-1 A. Stolze, misnotað víti ('45+4)
PEC Zwolle 2 - 1 Den Haag
Aston Villa 0 - 0 Leicester
Hibernian 3 - 2 Rangers
Cittadella 1 - 0 Triestina
Athugasemdir
