Heimild: MBL
Arnar Sveinn Geirsson er að leita sér að nýju félagi eftir að hafa fengið tilkynningu um að hann sé ekki í áformum Óskars Hrafns Þorvaldssonar, nýs aðalþjálfara Breiðabliks.
Arnar er samningsbundinn Blikum út næsta sumar og allt þar til í október á næsta ári. Hann segist ekki hafa fundið fyrir miklum áhuga úr Pepsi Max-deildinni og ef ástandið helst óbreytt gæti hann hugsað sér að hætta í fótbolta.
„Það er bara ekkert í gangi eins og staðan er í dag. Ég hef heyrt af áhuga frá liðum í efstu deild en það hefur ekkert lið haft samband við mig. Mín tilfinning er sú að liðin séu aðeins að halda aftur af sér og að það verði ekki einhverjir leikmenn sóttir nema nauðsyn þyki," sagði Arnar Sveinn í samtali við Morgunblaðið.
Arnar segist ekki hafa áhuga á að spila í Inkasso-deildinni en hann á 103 leiki að baki í efstu deild og varð Íslandsmeistari með Val 2017 og 2018.
„Eins og staðan er í dag veit ég ekkert hvernig næsta sumar verður. Það var vissulega leiðinlegt að fá þau skilaboð frá Óskari á fyrsta fundi að hann þyrfti ekki á mér að halda en svona er þetta. Maður gæti allt eins hætt í fótbolta ef málin þróast þannig en ég er með samning við Breiðablik og ég er ekki að stressa mig of mikið á þessu á þessum tímapunkti."
Sjá einnig:
Arnar Sveinn fékk leyfi til að ræða við önnur félög
Athugasemdir