Klopp mætti á fréttamannafund í morgun í aðdraganda leiks gegn föllnu liði West Bromwich Albion sem fram fer á sunnudag. Hann segir að framkoma Mane sé ekkert stórmál.

„Fótbolti er leikur tilfinninga en allir gera kröfu á því að við höfum alltaf fulla stjórn á tilfinningunum. Það er samt ekki þannig. Svona gerðist hjá mér þegar ég var leikmaður og hjá öðrum leikmönnum sem ég hef þjálfað," segir Klopp.

„Ég hef enn ekki rætt við Mane en mun gera það og við klárum málið. Allt verður í fínu lagi. Svona hlutir gerast, þetta er ekki í fyrsta sinn í mínu lífi og verður líklega ekki í það síðasta."

Klopp býst við snúnum leik á sunnudaginn þrátt fyrir að West Brom sé þegar fallið úr deildinni.

„Sam Allardyce á skilið að fá virðingu fyrir það sem hann hefur gert hjá West Brom. Liðið hefur safnað stigum, ekki nægilega mörgum en spilamennska liðsins hefur orðið betri og hann hefur fengið inn góða leikmenn," segir Klopp.