Fótbolti.net sagði fyrst frá því í lok janúar að KR væri í viðræðum um að fá Jakob Franz í sínar raðir frá Ítalíu.

„Jakob Franz er búinn að vera að æfa með okkur og við erum að reyna að klára þau mál með ítalska félaginu hans. Það gengur erfiðlega en við erum að bíða og vinna mikla vinnu í að klára það," sagði Rúnar og bætti síðar við:

„Við höfum verið í basli við að ná sambandi við Ítalina. Þetta er eilíf barátta, þeir eru ekkert að flýta sér að svara okkur."

KR er líka að vinna í því að fá Benóný Breka Andrésson, ungan leikmann frá Bologna. Benóný er uppalinn í Breiðabliki.

Jakob er uppalinn í Þór en fór eftir tímabilið 2020 til Venezia á lánssamningi. Í þeim samningi var forkaupsréttur sem Venezia nýtti sér.

Jakob varð tvítugur í síðasta mánuði og lék fyrri hluta tímabilsins á láni hjá FC Chiasso í Sviss.

Jakob getur bæði spilað sem bakvörður og miðvörður. Hann lék í nóvember sinn fyrsta U21 landsleik þegar íslenska liðið mætti Skotum í vináttuleik. Hann á að baki 22 leiki fyrir yngri landsliðin.