Marvin Ducksch skoraði bæði mörk Werder Bremen er liðið gerði 2-2 jafntefli við Borussia Mönchengladbach í þýsku deildinni í kvöld.

Eftir markalausan fyrri hálfleik tókst Marcus Thuram að koma Gladbach í forystu á 48. mínútu eftir að Bremen tapaði boltanum á miðsvæðinu. Jonas Hoffman kom með laglega hælsendingu inn á Thuram sem kom Gladbach yfir.

Gladbach klúðraði mörgum dauðafærum í þessum leik og kostaði það liðið. Ducksch jafnaði metin á 65. mínútu en átta mínútum síðar skoraði Florian Neuhaus.

Ducksch sá þó til þess að Bremen færi ekki tómhent heim úr þessari ferð og jafnaði eftir sendingu frá Niclas Füllkrug undir lok leiksins.

Gladbach er í 10. sæti með 31 stig og tímabilið mikil vonbrigði til þessa en Bremen er með jafnmörg stig í 11. sæti.