Heimild: Mbl.is
Íslenska landsliðskonan Sara Björk Gunnarsdóttir er á förum frá franska félaginu Lyon en þetta staðfesti hún í samtali við Víði Sigurðsson á mbl.is í gær.
Sara Björk gekk til liðs við Lyon sumarið 2020 og var fljót að láta til sín taka með því að skora í úrslitaleik Meistaradeildarinar gegn sínu gamla félagi, Wolfsburg.
Hún tók sér frí frá apríl á síðasta ári eftir að hún greindi frá því að hún væri ólétt. Sara snéri svo aftur í mars á þessu ári og hefur komið við sögu í síðustu leikjum. Liðið er einum sigri frá því að vinna frönsku deildina og er þá komið í úrslit Meistaradeildar Evrópu.
Samningur hennar við Lyon rennur út í sumar og staðfesti Sara Björk við mbl.is að hún ætlaði sér ekki að vera áfram.
„Já, þetta er ákveðið mál, ég fer frá Lyon eftir tímabilið, og eins og staðan er í dag er margt sem kemur til greina," sagði Sara við mbl.is.
Ekki er ljóst hvar hún mun spila en nokkrar deildir koma til greina.
„Nú erum við bara að þreifa okkur áfram og sjá hvað sé best í stöðunni. Það er margt í boði og spurningin er hvað hentar best á þessum tímapunkti. Deildirnar í Englandi, Frakklandi, Þýskalandi og á Spáni eru allar mjög spennandi og ég vil halda mig á þeim slóðum," sagði hún ennfremur.
Hún og Árni Vilhjálmsson, leikmaður Rodez, búa saman í Frakklandi og eiga soninn Ragnar Frank, en Árni samdi við Rodez til að vera nær fjölskyldunni. Hann er samningsbundinn B-deildarliðinu næstu tvö árin en gæti nú þurft að skoða sín mál.
„Það væri áhugavert að vera áfram með Rodez en fjölskyldan er númer eitt. Það mun alltaf finnast lausn á þessu," sagði Árni.
Athugasemdir