Túfa, þjálfari Vals.
Valsmenn fagna marki.
Túfa er brattur á framhaldið
„Þessi leikur er eftir mánuð. Með drættinum í dag klárum við að hugsa um þennan leik þar sem við erum með fullt af leikjum framundan. Bikarkeppnin er samt alltaf sérstök keppni og við viljum að sjálfsögðu komast áfram í undanúrslitin," sagði Srdjan Tufegdzic, þjálfari Vals, þegar hann ræddi við Fótbolta.net eftir að dregið var í átta-liða úrslit Mjólkurbikarsins.
Valur mun sækja ÍBV heim í næstu umferð bikarsins og verður það eflaust áhugaverður leikur, en það er nóg um að vera hjá Val áður en sá leikur verður spilaður. Næst annað kvöld þegar þeir mæta Breiðabliki í stórleik í Bestu deildinni.
Valur mun sækja ÍBV heim í næstu umferð bikarsins og verður það eflaust áhugaverður leikur, en það er nóg um að vera hjá Val áður en sá leikur verður spilaður. Næst annað kvöld þegar þeir mæta Breiðabliki í stórleik í Bestu deildinni.
Valur hefur núna unnið tvo leiki í röð eftir að hafa fengið skell í Kaplakrika og það er gott fyrir sálina.
„Já, auðvitað. Við sem erum í þessum bransa viljum vinna alla leiki sem við spilum og það hjálpar alltaf með sjálfstraust, og trú á verkefnið," sagði Túfa.
„Staðan er bara góð. Fyrir utan FH-leikinn finnst mér við hafa spilað mjög góða leiki. Það vantar herslumuninn að breyta jafnteflum í sigra. Öll tölfræði er okkar megin og mér finnst liðið á uppleið. Við höfum ekki enn náð okkar besta en ég er í engum vafa um að það muni koma. Það er hörkuleikur á mánudag á móti Breiðabliki og við erum í fullum fókus að undirbúa þann leik."
Umræðan var hörð á þig og liðið eftir leikinn gegn FH. Var erfitt að fram hjá henni?
„Nei, alls ekki. Við Valsarar þekkjum hvernig umræðan er þegar leikir tapast, og hvað þá stórt eins og í Kaplakrika. Það þarf enginn annar að gagnrýna okkur, við gerum það sjálfir. Við vorum drulluósáttir við frammistöðu okkar í leiknum, bæði ég og liðið. En fótbolti er þannig að þegar þú ert kýldur í magann, þá færðu alltaf tækifæri til að sýna hvað býr í þér. Við gerðum það strax í næsta leik á móti ÍA og svo gegn Þrótti," sagði Túfa.
„Núna er markmiðið að fylgja því eftir og þú færð ekki betra tækifæri en í Kópavogi. Það eru alvöru kröfur settar á Valsmenn. Við erum ekki sammála allri umræðunni. Það var helvíti gaman að sjá frétt á Fótbolta.net í gær þar sem tölfræði var tekin saman úr fyrstu sex umferðunum. Samkvæmt öllum þáttum fótboltans eigum við að vera í sæti númer eitt. Það sýnir að við erum að gera margt rétt og liðið er á uppleið."
„Það er herslumunurinn sem við þurfum að laga og gera betur með. Ég hef fulla trú á því að við verðum betri með tímanum," sagði þjálfari Valsmanna en hægt er að sjá allt viðtalið í spilaranum hér að ofan þar sem hann ræðir frekar um leikinn gegn Breiðabliki á morgun.
Athugasemdir
