Varnarmaðurinn Ingibjörg Sigurðardóttir segir tilfinninguna súra en að allt sé galopið og að liðið ætli enn að stefna að því að komast upp úr riðlinum eftir 1-0 tapið gegn Finnum í opnunarleik EM í dag.
Lestu um leikinn: Ísland 0 - 1 Finnland
Ísland tapaði opnunarleik Evrópumótsins gegn Finnum, 1-0, í Sviss í dag.
Frammistaðan var arfaslök í þeim fyrri en skánaði í þeim síðari.
Íslenska liðið varð fyrir mikilli blóðtöku í hálfleik er Glódís Perla Viggósdóttir, fyrirliði liðsins, þurfti að fara af velli vegna magakveisu, en Ingibjörg tók við bandinu í þeim síðari.
„Ótrúlega margt sem gerðist. Við náðum ekki að mæta klárar í fyrri hálfleik ef við vissum að það væri stress á fyrstu mínútunum og náðum ekki að hrista að af okkur eins fljótt og við vildum. Síðan er bara ótrúlega margt sem gerðist í framhaldinu,“ sagði Ingibjörg við fjölmiðla.
Margar í hópnum eru á þriðja stórmótinu. Á þetta ekki að vera orðið venjulegt?
„Það er mjög auðvelt að segja að þetta eigi að vera venjulegt en stórmót er stórmót. Við viljum ótrúlega mikið vinna og komast áfram. Með þeim markmiðum kemur pressa sem við setjum á okkur sjálfar, með pressu kemur stress og spenna. Maður getur nýtt reynslu sína í þetta og minnkað stressið en það verður alltaf stress og spenna þannig við þurfum að læra af þessu og gera betur næst en að sama skapi er þetta fyrsti leikur á stórmóti og allt opið þannig við erum ekki alveg að grafa hausinn niður í sandinn.“
Hildur Antonsdóttir sá rauða spjaldið í þeim síðari fyrir brot sem enginn sá nema dómarinn, en Ingibjörg segir að það var enginn möguleiki á að hreyfa við dómaranum sem var viss í sinni sök.
„Ég verð að viðurkenna að ég sá þetta ekki og ekki alveg hvað gerðist. Það var mjög erfitt að sjá þetta því það var mikið að gerast en dómarinn var handviss og þá er lítið hægt að segja við hana.“
Ingibjörg talaði einnig um Glódís Perlu, sem hefur verið einn besti varnarmaður heims síðustu ár, en það yrði mikil blóðtaka að vera án hennar.
„Já það er rosalega vont en við þurfum að vera viðbúnar þessu og fannst við tækla það ágætlega. Vonandi fáum við hana inn í næsta leik.“
„Hún er bara búin að vera mjög slöpp og búin að gera allt sem hún getur til að koma til baka fyrir þennan leik. Hún er búin að prófa allt og bara alger hetja fyrir að komið inn í þennan leik.“
Markmiðið er áfram það sama: Að komast upp úr riðlinum.
„Það er auðvitað súrt að tapa í fyrsta leik en að sama skapi þurfum við að vera fljótar að skipta um hugarfar og hugsa um næsta leik. Þetta er stórmót og þrír dagar í næsta leik. Við þurfum að fókusa á hann og vitum að þetta er langt mót. Við ætlum okkur að komast áfram og þá þurfum við að vinna næsta leik. Við byrjum á því.“
„Hundrað prósent. Þetta er fyrsti leikur og sex stig eftir í pottinum. Ef við vinnum báða leikina og byrjum á næsta leik þá er allt opið,“ sagði Ingibjörg eftir leikinn.
Athugasemdir
