Spánn: Sevilla rétt marði jafntefli á heimavelli

Staðan var markalaus alveg þar til á lokakaflanum. Heimamenn í Sevilla höfðu verið betri en þeir áttu í erfiðleikum með að brjóta varnarmúr gestanna á bak aftur og þá skoraði Anuar fyrir gestina.

Karim Rekik náði að jafna á 86. mínútu og tryggja þannig stig fyrir Sevilla sem er aðeins með eitt stig eftir tvær umferðir. Áhorfendur bauluðu sína menn af velli en þeir töpuðu óvænt fyrir Osasuna í fyrstu umferð. 

Valladolid er einnig með eitt stig eftir 0-3 tap á heimavelli gegn Villarreal í fyrstu umferð.

Sevilla 1 - 1 Real Valladolid
0-1 Anuar ('80)
1-1 Karim Rekik ('86)

Rayo Vallecano lagði þá Espanyol að velli og er með fjögur stig eftir að hafa gert markalaust jafntefli við Barcelona í fyrstu umferð.

Leikurinn gegn Espanyol byrjaði á tveimur rauðum spjöldum. Fyrst fékk Florian Lejeune tvö gul í liði gestanna og svo var Sergi Gomez rekinn útaf með beint rautt spjald í liði heimamanna.

Vallecano nýtti færin sín í nokkuð jöfnum leik og náði í dýrmæt stig spilandi tíu gegn tíu.

Isaac Palazon skoraði frábært mark eftir skemmtilega útfærða aukaspyrnu á 40. mínútu og tvöfaldaði Pathe Ciss forystuna í síðari hálfleik. Lokatölur urðu 0-2.

Espanyol 0 - 2 Rayo Vallecano
0-1 Isaac Palazon ('40)
0-2 Pathe Ciss ('59)
Rautt spjald: Florian Lejeune, Vallecano ('16)
Rautt spjald: Sergi Gomez, Espanyol ('30)