Lukaku fór meiddur af velli eftir tæklingu frá Lassie Nielsen inn í teig. Belgíski framherjinn vann vítaspyrnu fyrir Chelsea en neyddist til að fara af velli vegna meiðsla í ökkla.

Werner fór þá af velli undir lok fyrri hálfleiks vegna meiðsla í nára en Tuchel býst þó ekki við að þeir verði lengi frá. Þeir missa að minnsta kosti af leiknum gegn Norwich um helgina og segir Tuchel það frábært tækifæri fyrir aðra leikmenn sem hafa beðið eftir tækifærinu.

„Romelu sneri upp á ökklann á sér og svo voru þetta vöðvameiðsli og í nára hjá Timo, þannig þeir verða frá í nokkra daga býst ég við," sagði Tuchel.

„Við erum vanalega í góðum málum þegar það kemur að meiðslum. Christian Pulisic er meiddur en við söknum allra leikmanna. Við eigum mikið af leikjum og í mörgum keppnum þannig við þurfum að finna lausnir og sleppa afsökunum."

„Þessir tveir leikmenn voru í góðu formi, þeir eru hættulegir og geta skapað færi og skorað þannig nú þurfum við að finna lausnir og þeir leikmenn sem hafa beðið eftir tækifærinu þurfa að stíga upp og skora. Keppnin er hafin og þeir leikmenn sem byrja gegn Norwich fá traustið og við munum svo halda áfram að finna lausnir," sagði hann í lokin.