Konráð er hávaxinn og sterkur miðjumaður sem kemur eflaust til með að styrkja lið Völsungs.

Hann hefur verið fyrirliði Tindastóls undanfarin ár þrátt fyrir að vera ekki elsti leikmaðurinn í bransanum. Hann er fæddur árið 1995 og er því á 25. aldursári.

Konráð á að baki 120 meistaraflokksleiki fyrir Tindastól og Drangey og hefur skorað í þeim 15 mörk.

Við sama tilefni skrifuðu nokkrir leikmenn undir tveggja ára samninga við félagið. Guðmundur Óli Steingrímsson, máttarstólpi í liðinu og hokinn af reynslu, réð á vaðið og í kjölfarið fylgdu hinir ungu Arnar Pálmi Kristjánsson, Elmar Örn Guðmundsson og Steinarr Bergsson.

Þá framlengdi Ásgeir Kristjánsson einnig samning sinn áður en hann hélt aftur út til Bandaríkjanna í nám.

Á síðasta tímabili féll Tindastóll úr 2. deild, en Völsungur hafnaði í sjötta sætinu.