„Eins og þú segir, svekkjandi,“ sagði Arna Eiríksdóttir, fyrirliði FH, eftir 1-2 tap gegn Val í Kaplakrika í dag.
Lestu um leikinn: FH 1 - 2 Valur
„Mér svo sem fannst við ekki góðar í dag og við áttum ekkert endilega eitthvað mikið meira skilið út úr þessum leik heldur en þetta,“ hélt hún svo áfram.
„Mér fannst við eiga góða kafla í þessum leik en við áttum allt of mörg móment þar sem var bara slökkt á okkur og við erum ekki vanar því að vera að fá á okkur mörk úr föstum leikatriðum en fyrsta markið kemur eftir horn og það er bara svolítið eins og leikurinn var. Það slokknað á okkur í mikilvægum mómentum og það bara kostaði okkur í dag.“
Arna var orðuð við landsliðshópinn sem heldur á EM núna á næstu dögum en á endanum dró hún stutta stráið og landsliðsþjálfarinn ákvað að skilja hana eftir utan hóps. Aðspurð hvort það hafi ekki verið svekkjandi segir hún:
„Já, ég ætla bara að vera hreinskilin, það var mjög svekkjandi en við náttúrulega búum svakalega vel að hafsentum á Íslandi og það eru mjög góðir leikmenn í þessum hóp en ég get alveg viðurkennt það að ég var mjög svekkt yfir því að vera ekki í hópnum.“
Viðtalið í heild sinni má sjá í spilaranum hér að ofan.
