Ólafur Jóhannesson.
,,Ég er fyrst og fremst ánægður með stigin þrjú, við vorum að spila á móti góðu Selfoss liði," sagði Ólafur Jóhannesson, þjálfari Hauka, eftir 3-2 sigurinn á Selfossi í 1. deild karla í kvöld.
,,Við vissum það fyrir leikinn að þeir myndu kannski liggja til baka á okkur. Mér fannst við vera mun betri í fyrri hálfleik og vorum með góða stjórn á leiknum en síðan duttum við aðeins til baka í seinni hálfleik og það lá svolítið á okkur. En ég er fyrst og fremst ánægður með stigin.“
Eftir að Javier Zurbano Lacalle hafði komið heimamönnum yfir sneru Haukar blaðinu við með mörkum frá Hilmari Trausta Arnarssyni, Brynjari Benediktssyni og Hilmari Geir Eiðssyni í fyrri hálfleik.
,,Við héldum boltanum vel í fyrri hálfleik og létum hann rúlla vel. Við sköpuðum okkur nóg af færum til að gera þrjú, fjögur, fimm mörk. Ég er fyrst og fremst ánægður með það og ég er líka ánægður með að við skildum lifa seinni hálfleikinn af með miklum dugnaði," hélt Ólafur áfram.
Leikmenn Hauka duttu til baka í seinni hálfleik og minnkaði Josep David Yoffe síðan muninn í eitt mark fyrir Selfyssinga.
,,Við ætluðum ekki að liggja til baka en þetta gerist í fótbolta, menn verða hræddir og ætla verja sitt með að detta til baka. Það er ávísun á vesen," bætti Ólafur við sem er bjartsýnn á framhaldið en liðið er í öðru sæti með sex stig.
,,Það eru bara þrír leikir búnir og liðin eru að slípast til. Við eigum eftir að verða betri og ég er ánægður með spilamennskuna fram að þessu. Við verðum bara betri og betri eftir því sem líður á sumarið."
Nánar er rætt við Ólaf í viðtalinu hér að ofan þar sem hann hrósar vallaraðstæðum á Selfossi í hástert.
