Ívar Örn Árnason leikmaður KA var hæstánægður eftir að liðið hans vann 3-0 gegn Stjörnunni á útivelli í dag.
Lestu um leikinn: Stjarnan 0 - 3 KA
„Sætur sigur, og það var svona frekar þungt einhvernvegin í mönnum, þetta var svolítið erfið byrjun. Stjarnan mætti okkur bara helvíti hvassir í byrjun og leyfðu okkur ekkert að spila út og voru bara helvíti öflugir í því svo þegar leið aðeins á fyrri hálfleikinn þá vorum við fljótir að vinna okkur aðeins inn í leikinn. Svo fer bara allt í háaloft hérna, ég held nú bara að Danni Lax hafi bara séð eitthvað rautt þarna, ég ætla ekkert að kommenta á þetta en það bara klárlega breytti gangi leiksins. Við ákváðum bara í hálfleik að vera aðeins rólegir og ég verð bara að hrósa Stjörnunni mér fannst þeir spila helvíti vel bara hérna í seinni hálfleik þrátt fyrir að vera manni færri. En í heildina þá var þetta bara helvíti öflugur sigur hjá okkur og gaman líka að einn ungur hafi getað komið inná."
Ívar var valinn í Úrvalslið Bestu deildarinnar af Fótbolta.net eftir frábært tímabil.
„Þetta er bara alvöru heiður í raun. Þetta var klárlega eitt af markmiðunum mínum svona þegar maður gat byrjað að tengja saman nokkra sigra og komist í lið umferðarinnar þá leyfði maður sér að dreyma að komast kannski í lið ársins sem er bara sannur heiður og klárlega eitt af markmiðunum mínum náð. Ég vil þakka .net fyrir það."
Ívar hefur tekið miklum framförum þar sem Tómas Þór sagði meðal annars í útvarpsþættinum um helgina að hann hefði verið bara vara vinstri bakvörður liðsins fyrir 2-3 árum.
„Og ég kæmist ekki einu sinni sem rútubílstjóri í lið ársins, já ég hlustaði. Ég minnkaði við mig í vinnu og ákvað að taka sem flestar aukaæfingar sem KA býður upp á, á veturna. Þá æfum við svona 3-4 sinnum í viku á morgnana, ég bara mætti á þær og ég vissi alltaf að þó svo að það höfðu ekki allir trú á mér þá hafði ég svo sannarlega trúnna á sjálfum mér og ég er með stórt bakland að mér og ég er náttúrulega með KA hjarta og vildi ekkert meira en að troða sokk upp í þónokkra innan klúbbsins. Ég vissi líka alltaf að Dusan yrði í banni í fyrstu þrem leikjunum og ég myndi þá að öllum líkindum fá að spila þá og ég ákvað þá bara að setja mér markmið að vera það góður í þeim að það væri ekki hægt að taka mig úr liðinu. En í vetur ég gerði svo sem ekkert sérstakt held ég."
Viðtalið má sjá í heild sinni í spilaranum hér fyrir ofan þar talar Ívar nánar um Dusan Brkovic og hvernig það er að spila með honum.
