Leiknismenn fagna eftir leik.
Leiknir Fáskrúðsfirði náði á ótrúlegan hátt að bjarga sæti sínu í Inkasso deild karla í dag með því að vinna 7-2 sigur á HK í Kórnum á sama tíma og Selfoss vann Huginn 4-1 og sendi þá niður.
Lestu um leikinn: HK 2 - 7 Leiknir F.
Fyrir daginn var ljóst að Leiknir F varð að vinna og Huginn að tapa og markasveiflan þurfti að verða 7 mörk. Þetta gekk allt eftir og gott betur því markasveiflan varð á endanum 8 mörk. Í sjónvarpinu að ofan má sjá Leiknismenn fagna í leikslok og viðtal við Viðar Jónsson þjálfara liðsins.
„Vá, ég bara trúi þessu," sagði Viðar við Fótbolta.net eftir leik. „Þetta er ótrúlegt, þetta er eins og draumur. Ég setti upp á skjávarpann á fundinum með strákunum í gær að nú ættu allir að láta sig dreyma í alla nótt, þetta væri hægt. Draumurinn varð að veruleika. Það er allt hægt," hélt hann áfram.
„Við erum ekki búnir að æfa vörn alla vikuna og bara búnir að vera í sóknaraðgerðum, skotæfingum, fyrirgjöfum og fylgja á eftir. Bara sóknaræfingar og við komum bara og ætluðum að pressa. Við höfðum trú á þessu."
Nánar er rætt við Viðar í sjónvarpinu hér að ofan en sonur hans Kristófer Páll var kominn með þrjú mörk þegar Leiknir fékk víti í lokin. Ljóst var að sæti í Inkasso var í húfi ef honum tækist að skora og það gerði hann. Treysti Viðar honum alltaf?
„Já, klárlega. Hann þrífst á að fá að skora mörk og hann fékk gullið tækifæri til þess þarna. Svo vorum við í símanum hinum megin. Það er hundleiðinlegt að horfa á eftir Huginn niður en þetta var bara við eða þeir svo það var ekkert um annað að ræða," sagði hann.
