Mourinho: Sérstök stund fyrir Cech gegn Chelsea

Arsenal mætir Chelsea í úrslitaleik Evrópudeildarinnar næstkomandi miðvikudag, þann 29. maí, í Baku, höfuðborg Aserbaídsjan.

Petr Cech, markvörður Arsenal, mun þá líklega leika sinn síðasta leik fyrir Arsenal. Hann hefur varið mark Arsenal í Evrópudeildinni í vetur og mun líklega fá tækifæri í úrslitaleiknum.

Petr Cech lék með Chelsea áður en hann gekk í raðir Arsenal. Hjá Chelsea vann hann fjöldan allan af titlum og var besti markvörður úrvalsdeildarinnar í ára raðir. Hann kveður Arsenal í sumar og leggur markmannshanskana á hilluna.

Cech tekur við sem yfirmaður íþróttamála hjá Chelsea í sumar.

Jose Mourinho, fyrrum stjóri Cech hjá Chelsea, var í viðtali við Sky Sports í gær og tjáði hann sig um þennan síðasta leik Cech á ferlinum. Hann segir þetta sérstaka stund fyrir enska knattspyrnu sem og Cech.

<i>„Þetta er leikurinn sem hann hefði viljað spila til að klára ferilinn áður en hann snýr heim til Chelsea,"</i> sagði Mourinho.

<i>„Hann myndi elska að hætta með sigri þar sem hann er mikill sigurvergari."</i>