Pressan á knattspyrnustjóra aldrei meiri
Kristján Guðmundsson.
„Það virðist kominn einhver eineltis-kúltúr í gang gagnvart knattspyrnustjórum og þjálfurum um allan heim. Mér leiðist að nota orðið einelti en stjórinn er kominn í mikinn fókus og það virðist eingöngu stjóranum að kenna hvernig gengið er. Auðvitað ber hann ábyrgð en það er svo margt annað í þessu," segir Kristján Guðmundsson, þjálfari Leiknis og varaformaður Knattspyrnuþjálfarafélags Íslands.
Kristján var í spjalli við Tómas Þór og Elvar Geir í útvarpsþættinum Fótbolti.net á X-inu FM 97,7 síðasta laugardag þar sem rætt var um breytt umhverfi knattspyrnustjóra og þjálfara. Starfstími knattspyrnustjóra hjá hverju félagi í ensku úrvalsdeildinni og víðar er sífellt að verða styttri.
Talið er að breytingar á fjölmiðlaumfjöllun og samfélagsmiðlavæðingin hafi þarna mikið að segja og auðveldara að skapa pressu en áður.
„Twitter er til margs nýtilegt, til góðra og slæmra verka. Það eru ansi margir sem telja að þeir hafi þann rétt að segja hvað sem er um hvern sem er þarna, vera með dylgjur án rökstuðnings. Þegar hamrað er á hlutum stanslaust, einhverju sem er kannski ekki fótur fyrir, þá vindur þetta upp á sig. Bullið er það oft endurtekið að þú ferð að taka því eins og það sé rétt," segir Kristján.
„Þetta helst í hendur við peningana í boltanum. Sky tók yfir enska boltann og í kjölfarið breyttist fréttamennskan. Æsifréttamennskan jókst til að reyna að selja hlutinn."
Kveikjan að umræðunni var áhugaverður pistill sem Kristján deildi á Twitter á dögunum.
Þar er því meðal annars velt upp hvort Sir Alex Ferguson hefði verið rekinn frá United áður en titlrarnir hrönnuðust inn ef umhverfið hefði verið það sama.
„Það er mjög góð spurning að velta því fyrir sér hvort hann hefði „lifað" þetta af? Hann var búinn að vera í þrjú ár án þess að vinna neitt. Allir þessir samskiptamiðlar, ummælakerfi og fjölmiðlarnir sem hamast á mönnum í dag," segir Kristján en umræðuna má heyra í heild sinni í spilaranum hér að ofan.
Sjá einnig:
Hlustaðu á útvarpsþáttinn í heild sinni
Athugasemdir
