Mjólkurbikarinn: KR rétt marði Njarðvík

KR heimsótti Njarðvík í lokaleik kvöldsins í Mjólkurbikarnum og úr varð mikill baráttuleikur.

Staðan var markalaus eftir bragðdaufan fyrri hálfleik þar sem Njarðvíkingar veittu KR-ingum alvöru leik, fengu fleiri færi og komust nær því að skora.

Leikurinn var áfram í sama fari eftir leikhlé þar sem Njarðvíkingar voru hættulegri en náðu ekki að leggja lokahönd á sóknirnar sínar.

Það var því mikill skellingur fyrir Njarðvíkinga þegar Hallur Hansson setti boltann í netið á 84. mínútu eftir góða sendingu frá Theódóri Elmari Bjarnasyni. Markið kom upp úr þurru þar sem einstaklingsgæðin í liði KR gerðu herslumuninn.

Njarðvíkingar lögðu allt í sóknina á lokamínútunum og var það Robert Blakala markvörður sem átti hörkuskalla í uppbótartíma en inn rataði boltinn ekki.

Niðurstaðan svekkjandi og ósanngjarnt tap Njarðvíkur sem hefur þó átt gott sumar hingað til og trónir á toppi 2. deildar.