Evrópa í dag - Villarreal ætlar í Meistaradeildina

Í Þýskalandi eiga Bochum og Werder Bremen heimaleiki gegn Union Berlin og St. Pauli.

Bochum vermir neðsta sæti efstu deildar og þarf kraftaverk til að bjarga sér frá falli í lokaleikjum tímabilsins. Liðið er fimm stigum frá umspilssæti um að halda sér uppi í Bundesliga en Union Berlin verður erfiður andstæðingur.

Gestirnir frá Berlín eru þegar búnir að bjarga sér frá falli en munu ekki gefa neitt eftir í dag.

Werder Bremen er þá í harðri baráttu um sjötta sætið, sem veitir farmiða í Sambandsdeild Evrópu næsta haust. Borussia Dortmund situr í því sæti sem stendur en Bremen er aðeins þremur stigum á eftir og með leik til góða.

Bremen tekur á móti nýliðum St. Pauli sem hafa komið á óvart á tímabilinu og eru fimm stigum fyrir ofan fallsvæðið með leik til góða á næstu lið í kring.

Að lokum eigast Villarreal og Espanyol við í La Liga. Þar geta heimamenn í liði Villarreal stokkið upp í Meistaradeildarsæti með sigri á meðan Espanyol siglir þokkalega lygnan sjó, sjö stigum frá fallsvæðinu, eftir gott gengi á síðustu vikum.

Bundesliga:
13:30 Bochum - Union Berlin
15:30 Werder - St. Pauli

La Liga:
14:15 Villarreal - Espanyol