Fyrirliðinn Orri Steinn Óskarsson mætti aftur í hópinn eftir meiðsli og er augljós sigurvegari. Hann átti enga glimrandi frammistöðu úti á vellinum gegn Kanada en tók færin sín tvö frábærlega og minnti á hversu mikilvægur hann er liðinu.

Gylfi Þór Sigurðsson kom ekki við sögu gegn Kanada en byrjaði gegn Haítí og lék stærstan hluta leiksins. Hann var besti leikmaður liðsins í leiknum, styrkti markametið sitt, varð næstelsti markaskorari í sögu landsliðsins og sýndi öllum að hann getur enn spilað á þessu getustigi. Kári Árnason, yfirmaður fótboltamála hjá Víkingi og fyrrum liðsfélagi Gylfa í landsliðinu, kallaði í enn eitt skiptið eftir Gylfa í liðið eftir leikinn í gær. Kári lagði til að Hákon Arnar Haraldsson yrði færður út á kant í sterkasta liði Íslands og Gylfi kæmi inn á miðjuna með Ísaki Bergmanni Jóhannessyni.

Loks var Daníel Leó Grétarsson sigurvegari í þessum glugga, en þó alls ekki fullkominn sigurvegari. Daníel Leó átti að vera með í þessu landsliðsverkefni en meiddist í síðasta leik með Sönderjyske og fór því ekki með til Kanada. Daníel er meiddur á ökkla og verður eitthvað frá vegna meiðslanna. Helsti kostur leikmanns er að geta verið til taks og Daníel tikkaði ekki í það box. En þeir sem spiluðu í hjarta varnarinnar sýndu landsliðsþjálfaranum enga drauma frammistöðu. Sverrir Ingi Ingason er miðvörður númer eitt í landsliðinu og stóð sig fínt gegn Kanada. Hörður Björgvin Magnússon spilaði við hlið Sverris gegn Kanada og gaf mjög klaufalegt víti í þeim leik. Í marki Haítí í gær litu svo þeir Aron Einar Gunnarsson og Hjörtur Hermannsson, sem kallaður var inn í hópinn fyrir Daníel, í hjarta varnarinnar ekki mjög sannfærandi út.

Íslenska landsliðið kemur næst saman í lok maí og spilar í Japan gegn heimamönnum og Íran (óstaðfestur mótherji). Næsta verkefni á eftir því er svo í Þjóðadeildinni næsta haust sem er mjög mikilvæg upp á mögulegt EM sæti.