„Fyrirfram hefði maður kannski sætt sig við jafntefli á útivelli gegn Noregi. Hvernig fyrri hálfleikurinn spilaðist og við sýndum og sönnuðum fyrir okkur sjálfum að við höfðum góða yfirhönd á þessu þá er maður svolítið svekktur eftir leik," sagði Sandra María Jessen um svekkjandi jafntefli landsliðsins gegn Noregi í Þjóðadeildinni á föstudaginn.
„Þetta hefðu getað verið mikilvæg stig sem við hefðum getað tekið með okkur. Það er eitthvað sem við tökum með okkur í seinni leikinn og hjálpar okkur að mótivera okkur til að vinna þann leik."
Liðið mætir Frakklandi í lokaleik Þjóðadeildarinnar á morgun á nýju hybrid grasi á Laugardalsvelli.
„Það er rosalega gaman að fá síðasta leikinn á heimavelli. Nýju grasi, fyrir framan okkar fólk, góða íslenska veðrinu sem vinnur með okkur," sagði Sandra María.
Frakkland er með gríðarlega sterkt lið en íslenska liðið er staðráðið í að taka öll stigin.
„Eigum alltaf möguleika. Erum með það mikil gæði í hópnum og sterka liðsheild að við getum gefið hvaða landi sem er alvöru leik og munum gera það á þriðjudaginn. Það er klárlega markmið að fara í þennan leik til að ná í þrjú stig," sagði Sandra María.
